MÜHARİBƏ DÖVRLƏRİNDƏ MÜLKİ MÜDAFİƏ KƏŞFİYYATININ VƏZİFƏLƏRİ VƏ TƏDRİSİ MƏSƏLƏLƏRİ

Xülasə

Məqalədə müasir dövrdə dünyada baş verən müharibələr, hərbi münaqişələr, siyasi gərginliklər və müxtəlif xarakterli fövqəladə hadisələr əhalinin təhlükəsizliyinin təmin edilməsini, insanların həyat və sağlamlığının qorunmasını dövlətlərin qarşısında duran ən mühüm vəzifələrdən biri kimi göstərilmişdir. Demək lazımdırki, müharibə dövründə mülki müdafiə kəşfiyyatının əhəmiyyəti daha da artır. Çünki hərbi əməliyyatlar zamanı vəziyyət sürətlə dəyişə, yaşayış məntəqələri və mühüm obyektlər zərər görə, rabitə və nəqliyyat sistemlərinin fəaliyyəti pozula bilər. Belə şəraitdə ərazidəki real vəziyyətin vaxtında müəyyən edilməsi və təhlükələrin düzgün qiymətləndirilməsi insanların həyatının xilas olunmasında həlledici rol oynaya bilər. Məsələn, dağıntıya məruz qalmış ərazidə xilasetmə işlərinə başlamazdan əvvəl binaların dayanıqlığı, yanğın təhlükəsi, qaz sızması ehtimalı, yolların keçilməz vəziyyətə düşməsi və zərərçəkmiş insanların yerləşdiyi yerlər haqqında məlumatların toplanması vacibdir. Bu məlumatlar xilasedicilərin fəaliyyətinin düzgün təşkil edilməsinə, əlavə itkilərin qarşısının alınmasına və mövcud qüvvə və vasitələrdən səmərəli istifadə olunmasına imkan yaradır.